ДЗÆУДЖЫХЪÆУ ÆМÆ АЛАНИЙЫ СТЫРАЛЧЕР ЛЕОНИДЫ КУАДЗÆНЫ АРФÆЙЫ ФЫСТÆГ

Дзӕуджыхъӕу ӕмӕ Аланийы стыралчер, Сомихы Республикӕйы Уырыссаг Рӕстдин Аргъуаны зылдты фӕткдӕттӕг Иууылрухсгонд ЛЕОНИДЫ

КУАДЗӔНЫ АРФӔЙЫ ФЫСТӔГ

Дзӕуджыхъӕу ӕмӕ Аланийы епархи ӕмӕ Сомихы Республикӕйы Уырыссаг Рӕстдин Аргъуаны зылдты монад, моладзантӕ ӕмӕ кувӕг адӕммӕ

 

Чырыстийы ӕмдзинады кӕрӕдзийӕн уарзон сауджынтӕ, диакъонтӕ, ӕфсымӕртӕ ӕмӕ хотӕ!

Цины уацимӕ уыл ӕмбӕлын Чырыстийы Райгасы стыр ӕмӕ рухс бон ӕмӕ уын зӕрдӕбын салам дӕттын Куадзӕны зӕрдӕмӕхъаргӕ арфӕйӕ: 

 

ЧЫРЫСТИ РАЙГАС!

 

Райгасы уац ӕгас чырыстон динахуырады сӕрӕвӕрӕн дур у: апостол Паулейы загъдау, «кӕд мӕрдтӕн райгасы амал нӕй, уӕд Чырысти дӕр нӕ райгас; ӕмӕ кӕд Чырысти нӕ райгас, уӕд нӕ уацамынд дӕр дзӕгъӕлы у ӕмӕ уӕ уырнындзинад дӕр дзӕгъӕлы у» (1Кор 15:13–14). Чырыстийы ӕппӕт зӕххон цард ӕмӕ Йӕ Дзуар се ’цӕг нысаниуӕг ӕрмӕстдӕр Йӕ Райгасы ссарынц. Рухс Куадзӕн у Бардарӕг Йесойы раудӕгасы райдайӕн, ӕнӕ уымӕй та Аргъуанӕн уӕвӕн нӕй.

Йесо Чырыстийы Райгас у, хуымӕтӕг зонадон ӕмӕ историон фӕлтӕрддзинады фӕлгӕтты чи нӕ цӕуы, ахӕм цау. Уый нӕ уыди мард буары фӕстӕмӕ цардмӕ раздӕхт, зӕгъӕм, рӕстгӕнӕг Лазыр кӕнӕ наинаг идӕдзы лӕппуйы раудӕгасау (Ин 11:43–44; Лк 7:11–17). Чырыстийы Райгас у ног хуызы царды равзӕрд, мӕлӕтӕн лӕвӕрд чи у, уыдоны ӕхсӕн ӕнусон царды сӕнтыст, ӕппӕт мӕрдты раудӕгасы райдайӕн ныридӕгӕн мах дунейы. Чырыстийы ӕмдзинады чи ис, уыдон се ’ппӕт дӕр Йемӕ иу сты, Йӕ цардӕй цӕрынц, рухс апостол куыд фыста, афтӕ, «алчидӕр йӕ рады: фыццаг – Чырысти, стӕй та – Йӕхионтӕ, Чырысти куы ӕрцӕуа, уӕд» (1Кор 15:23).

Бардарӕг Йесо Чырыстийы, Йӕ Райгасыл Ын хъуыды кӕнгӕйӕ, адӕймаг бынтондӕр йӕ зӕрдӕмӕ айсы ӕцӕг Мессиайы хуызы, уымӕн ӕмӕ Уый  «дзуарылтыгъдӕй амӕлыны онг» (Флп 2:8) коммӕгӕс уыди Уӕларвон Фыдӕн. Йесо Чырыстиимӕ ӕрцыди, уӕлдӕр кӕмӕй нӕй, Хуыцауы уыцы ног уӕвынад адӕмы ӕхсӕн. Уыцы уӕвынад йӕхицӕн уӕлахизӕй фӕндаг гӕрды, ӕмӕ йӕ Хуыцау нал аивдзӕн. Чырысти йӕ хоны Хуыцауы Паддзахад. Уыцы Паддзахад домы, цӕмӕй, Хуыцау афтӕ хӕстӕг кӕм ӕрцыди, уым адӕймаг кӕронмӕ аскъуыддзаг кӕна, йӕ зӕрдӕмӕ Йӕ исы, ӕви нӕ. Йӕ Райгасы фӕрцы Чырысти сфидар кодта, Хуыцау  адӕммӕ кӕй ӕрӕрвыста, ӕппӕты Уыцы Ирвӕзынгӕнӕг кӕй у, уый. Фӕстаг ныхасы бар Уымӕн ис ӕмӕ йын аивӕн нӕй, уымӕн ӕмӕ Хуыцауы хираргомы арӕн у, Хуыцау Йӕхи Йӕ Фырт Йесо Чырыстийы раргом кодта.

Чырыстийы Куадзӕн – ног рӕстӕджы ӕмӕ ног дунейы райдайӕн. Чырыстийы Райгасӕй мах бамбӕрстам, адӕймаджы сӕраппонд Хуыцау Йӕ Фырты хуызы бынтондӕр кӕй фӕуӕлахиз ис тӕригъӕд ӕмӕ мӕлӕтыл, уымӕн ӕмӕ Чырысти у, адӕм ног ӕрдзыхъӕд ӕмӕ ӕнусон цард Кӕмӕй исынц, Уыцы «Дыккаг Адам» (1Кор 15:45).

Голгофӕйы ӕмӕ Аримафаг рӕстгӕнӕг Иосебы дыргъдоны цаутӕй цӕстуынгӕ дунейы фӕткӕвӕрд нӕ фендӕрхуызон ис, фӕлӕ йӕ сусӕггаг арфы ӕрцыди стыр ивддзинад.  Хуыцауы Дзырд Адӕймаг кӕй буары сси (Ин 1:14), уыцы галилейаг Ахуыргӕнӕг, «чи амарди, уыдонӕй фыццаг» (1Кор 15:20), адӕмӕн ӕрхаста Хуыцауы Паддзахад. Чырыстийы ӕнцонӕй чи айста ӕмӕ Дзы «Фӕндаг, Ӕцӕгад ӕмӕ Цард» (Ин 14:6) чи ссардта, уыдонӕн ӕм се ’ппӕты бон дӕр у бацӕуын.

Уӕдӕ ацы табуйаг бон Куадзӕны амондӕй байрайӕм ӕмӕ ӕххӕстӕй банкъарӕм, нӕ царды фӕндагыл цыфӕнды зынтӕ ӕмӕ цӕлхдуртыл дӕр кӕй фӕрцы фӕуӕлахиз уыдзыстӕм, Чырыстийы Райгасы уыцы рухс цин ӕмӕ йӕ адих кӕнӕм нӕ хиуӕттимӕ, цыбыркъух ӕмӕ ӕвӕрӕзтимӕ, ӕнӕфӕразгӕ ӕмӕ иунӕг чи у, уыдонимӕ!

Ногӕй ӕмӕ уын ногӕй зӕрдӕбын арфӕ кӕнын Чырыстийы Рухс Куадзӕны номӕй. Хуыцау уын ӕххуысгӕнӕг уӕд уӕ алы хорз хъуыддаг ӕмӕ фарны акъахдзӕфы, ӕнӕниз ӕмӕ удвидар ут, уӕ хӕдзӕртты бӕркад уӕле исгӕ бынӕй ахадгӕ уӕд, уӕ зӕрдӕты та ма ивайӕд Хуыцауы уарзондзинад. Чи Райгас, Уыцы Хуыцау арфӕ ракӕнӕд нӕ адӕмтӕ ӕмӕ нӕ бӕстӕтӕн ӕмӕ сын фарн ӕмӕ амонд раттӕд. Адӕм кӕрӕдзи куыд уарзой, кӕрӕдзийӕн аргъ куыд кӕной ӕмӕ куыд ӕмбарой, уыцы хорзӕх сын саккаг кӕнӕд!

 

ЧЫРЫСТИ ӔЦӔГӔЙ РАЙГАС!

 

 Дзӕуджыхъӕу ӕмӕ Аланийы стыралчер,

Сомихы Республикӕйы Уырыссаг Аргъуаны зылдты фӕткдӕттӕг ЛЕОНИД

 

 

Чырыстийы Куадзӕн

2019 аз

Дзӕуджыхъӕу